ސިބްކޯ އަށް ނޯޓިސް ދިނީ އެތަނަށް ކުލީގެ އިތުރުން، އެޑްވާންސް ފައިސާ ވެސް ނުލިބިގެންނެވެ. ސިބްކޯ އެތަނުން ބޭރުކޮށް، އެމްޑަބްލިޔުއެސްސީން ވަނީ ފައިސާ ހޯދަން މައްސަލަ ކޯޓަށް ވެސް ހުށަޙަޅައިފަ އެވެ. ހަމައެއާ އެކު، އެމްޑަބްލިޔުއެސްސީން ނޯޓިސް ދިން މައްސަލަ ސިބްކޯ އިން ވެސް ކޯޓަށް ހުށަހެޅި އެވެ. މިއިން އެއްވެސް މައްސަލައެއް ކޯޓަކުން އަދި ނުނިމެ އެވެ.

ޝާހު ވިދާޅުވި ގޮތުގައި ޕެވިލިއަނާ ގުޅޭ މައްސަލަތައް ކޯޓުން ބޭރުކޮށް، ސިބްކޯއާ އެކު އެތަން ހިންގަން ނިންމީ ވަރަށް ބޮޑަށް ވިސްނުމަށް ފަހު "އެއީ އެންމެ ރަނގަޅު ގޮތް ކަމަށް ފެނިގެން"ނެވެ. އޭނާ ވިދާޅުވީ އެގޮތަށް ހަމަޖެއްސުމުގައި ކުންފުނީގެ ލީގަލް ޓީމުގެ އިތުރުން މި މައްސަލަ އަށް ބޭރުން ހޯދި ލީގަލް ކޮންސަލްޓަންޓްގެ ލަފާ ވެސް ހިމެނޭ ކަމަށެވެ.

"ލީގަލް ޓީމުގެ ވާހަކަތަކަށް ބަލާއިރު އަޅުގަނޑުމެންނަށް އެ ކޭސް ކާމިޔާބުވާ ކަހަލަ ގޮތަކަށް ނޫން އޮތީ،" ޝާހު ވިދާޅުވި އެވެ.

"މިހާރު ވެސް މައްސަލަ އެހެން އޮންނަތާ އަހަރަކަށް ވުރެ ގިނަ ދުވަސް ވީ. މީގައި އަޅުގަނޑުމެން ބެލިއިރު އަޅުގަނޑުމެންގެ، އެމްޑަބްލިޔުއެސްސީގެ މައްސަލަތަކެއް ވެސް އެބަ އޮތް. އެހެންވެ އަޅުގަނޑުމެން އެކި ގޮތްގޮތުން ވިސްނީ މައްސަލަ ހައްލުކޮށްފައި އެކަން އަލުން ފަށައިގެން ކުރިއަށް ދާން." ޝާހު ވިދާޅުވިއެވެ.

ޝާހު ވިދާޅުވި ގޮތުގައި އުންމީދުތަކަކާ އެކު ބޮޑު ހޭދައެއްކޮށްގެން ހެދި ތަން ވީރާނާ ވާން ވެސް ދޫކޮށްލެވޭކަށް ނެތެވެ.

ކޯޓުން ބޭރުން މައްސަލަ ނިންމިއަސް، އެމްޑަބްލިޔުއެސްސީ އަށް އެއިން ލިބޭނެ އެއްވެސް ގެއްލުމެއް ނޯންނާނެ ކަމަށް ޝާހު ވިދާޅުވި އެވެ.