ހުޅުމާލޭގައި ސަރުކާރުން އަޅާފައިވާ ހިޔާ ފްލެޓްތަކުގެ މަހު ކުލި ކުޑަކޮށްދިނުމަށް އެދި ހިޔާ ޔޫނިއަންއިން ރައީސް އޮފީހާ ބައްދަލުކޮށް މަޝްވަރާކޮށްފިއެވެ.

ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ވިދާޅުވެފައިވާ ގޮތުގައި ހިޔާ ފްލެޓްތަކުގެ މަހު ކުއްޔަކީ މަހަކު 7،500ރ. އެވެ. އަދި ފުލެޓްގެ މެނޭޖްމަންޓް ފީގެ ގޮތުގައި ކޮންމެ މަހަކު 1،000ރ. ނަގާނެއެވެ. ނަމަވެސް ކުރީ ސަރުކާރުގައި އެއަގު ކަނޑައަޅާފައިވަނީ ޖުމުލަ 6،600ރ. އަށް ކަމަށް އެސަރުކާރުގައި އިސްކޮށް މަސައްކަތް ކުރެއްވި ބޭފުޅުންވަނީ ވިދާޅުވެފައެވެ.

ކުރީގެ ހައުސިންގ މިނިސްތަރު އަދި މިހާރުގެ މާލޭގެ މޭޔަރު ޑރ މުއިއްޒުވަނީ ފްލެޓްގެ އަގު 5،500ރ އަށް ކުޑަކޮށްދިނުމަށް ސަރުކާރުގައި އެދިވަޑައިގެންފައެވެ.

ހިޔާ ޔޫނިއަނުން ރައީސް އޮފީހާއެކު އިއްޔެ ބޭއްވި ބައްދަލުވުމުގައި 5600ރ. އަށް މަހު ކުލި ހަމަޖެއްސުމަށާއި، އިންޓީރިއާ ފިނިޝިންއަށް ދޭ ގްރޭސް ޕީރިއެޑް 12 މަހަށް ހެދުމުގެ އިތުރުން، ފްލެޓްގެ އިންޓީރިއާ އަށް ހަރަދުވާ އަގު ޖުމްލަ އަގުން 100،000ރ. މައާފް ކޮށްދިނުމަށް ވަނީ މަޝްވަރާކޮށްފައެވެ.