ރާއްޖޭގެ ކުރީގެ ރައީސް އަދި މިހާރުގެ ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން މިދިޔަ މަހުގެ ހަަވަނަ ދުވަހު ދިން ހަމަލާއަކީ އެމަނިކުފާނަށް ހަމަލާދިނުމަށް މަސައްކަތް ކުރި ތިންވަނަ ފަހަރު ކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.
ރައީސް ނަޝީދަށް ދީފައިވާ ޓެރަރިޒަމްގެ ހަމަލާގެ ތަހުގީގަށް ފާހަގަވެފައިވާ މުހިންމު ބައެއް މައުލޫމާތުތައް ދިނުމަށް ފުލުހުންނާއި ޕޮރޮސެކިއުޓާ ޖެނެރަލްގެ އޮފީސް ގުޅިގެން ބާއްވާ ޕްރެސް ބްރީފިންގައި މައުލޫމާތުދެއްވަމުން ސީޕީ ހަމީދު ވިދާޅުވިގޮތުގައި ނަޝީދު އަވަހާރަކޮށްލުމުގެ ތައްޔާރީތައް 2019 ވަނަ އަހަރު ފަށާފައިވާ ކަމަށާއި، އަދި 2020 ވަނަ އަހަރުގެ ފަހުކޮޅު އެކަމުގެ އަމަލީ މަސައްކަތް ފަށާފައިވާ ކަމަށް ތަހުގީގަށް ފާހަގަކުރެވިފައިވާ ކަމަށެވެ. އަދި މިދިޔަ މަހުގެ ހަވަނަ ދުވަހު ދީފައިވާ ހަމަލާއަކީ ނަޝީދަށް އަމާޒުކުރި ތިންވަނަ ހަމަލާ ކަމަށްވެސް ސީޕީ ހަމީދު ވިދާޅުވިއެވެ.
ޕްރެސް ބްރީފިންގައި މައުލޫމާތު ދެއްވަމުން އެސިސްޓެންޓް ކޮމިޝަނަރ އޮފް ޕޮލިސް މުހައްމަދު ރިޔާޒު ވިދާޅުވީ، ނަޝީދަށް ދިން ހަމަލާ އެމީހުން އަމާޒުކުރީ، ނަޝީދަކީ އިސްލާމްދީނާއި ކީރިތި ރަސޫލާއަށް ފާޅުގައި ފުރައްސާރަކޮށް ދީނުން ބޭރުވެފައިވާ މީހެއްގެ ގޮތުގައި ކަނޑައަޅާފައި އެމަނިކުފާނުގެ ލޭ ހުއްދަވެފައިވާ ކަމަށް ނިންމައިގެންނެވެ.
"އެކި ތަންތަނުގައި ރައީސް ނަޝީދު ރަސްމީ ވާޖިބު އަދާކުރުމުގެ ގޮތުން ކުރައްވާފައިވާ ކަންތަކާއި ދައްކަވާފައިވާ ވާހަކަފުޅުގެ ތެރެއިން އެމަނިކުފާނަކީ އިސްލާމްދީނަށް ފާޅުގައި ފުރައްސާރަކުރައްވާ މީހެއް ކަމަށާއި ދީނުން ބޭރުވެފައިވާ މީހެއް ކަމަށް ކަނޑައަޅައި މަރާލަން ޖެހިފައިވާ މީހެއްގެ ގޮތުގައި ދެކި އެ ކަމަށް މަގުފަހިކުރުމަށްޓަކައި ތަކުރާރުކޮށް މަސައްކަތްކުރަމުން އައިކަން ތަހުގީގަށް ފާހަގަކުރެވިފައިވޭ،" އެސިސްޓެންޓް ކޮމިޝަނަރ އޮފް ޕޮލިސް
ރައީސް ނަޝީދަށް އަމާޒުކޮށް ހަމަލާ ދިން މީހުންނަކީ އައިއެސްގެ ފިކުރަށް ތާއީދުކުރާ ރާއްޖޭގައި އައިއެސްގެ ފިކުރު ފެތުރުމަށް މަސައްކަތްކުރާ ބައެއް ކަމަށާއި އެމީހުން ދިވެހި ދައުލަތް ގަބޫލުނުކުރާ ކަމަށާއި އެމީހުން ދެކެނީ ދިވެހި ބިމާއި ދައުލަތަކީ "ކުފުރެއް" ކަމަށްވެސް ރިޔާޒު ވިދާޅުވިއެވެ.
ރިޔާޒު ވިދާޅުވީ، ރައީސް ނަޝީދަށް ހަމަލާދިނުމަށް ބޮން ހަރުކުރި ސައިކަލަކީ 2019 ވަނަ އަހަރު ގަނެފައިވާ ސައިކަލެއް ކަމަށާއި، އެމީހުން ވަނީ 2020 ވަނަ އަހަރު އެސައިކަލު މ.ޔާގޫތުގެ ކައިރީ ބަހައްޓައިގެން ވެސް ނަޝީދަށް ހަމަލާދިނުމަށް މަސައްކަތްކޮށްފައިކަން ތަހުގީގަށް ފާހަގަކުރެވިފައިވާ ކަމަށެވެ. އެގޮތުން އައިއީޑީ ހަރުކޮށްފައިވާ ސައިކަލު ހަތަރު ދުވަހެއްގެ މަތިން އެތަނުގައި ބަހައްޓައިގެން ގޮއްވާލަން މަސައްކަތްކޮށްފައިވާ ކަމަށްވެސް ރިޔާޒު ވިދާޅުވިއެވެ.
ޔާގޫތުގެ ކައިރީގައި ސައިކަލު ބަހައްޓައިގެން ހަމަލާ ނުދެވުމުން އެތަނުން ސައިކަލު ނަގައި އައިއީޑީ ޑިސްޕޯސްކުރި ކަމަށްވެސް ރިޔާޒުވިދާޅުވިއެވެ. ނަމަވެސް އޭގެފަހުން ދެވަނަ ފަހަރަށް ހަމަލާދިނުމަށް ނިންމީ ރައީސް ނަޝީދު ކަސްރަތަށް ނުކުންނަވާ ވަގުތުއެވެ. އެގޮތުން އެފަހަރުޔ މެރީބްރައުން ސަރަހައްދުގައި ހުންނަ ޕާކިން ޒޯނުގައި ސައިކަލު ބަހައްޓައިގެން ގޮއްވާލުމަށްވެސް މަސައްކަތްކޮށްފައިވެއެވެ.
"އެތަނުގައި ހަމަލާ ކުރިއަށް ނުގެންދެވުނީ އެމީހުން ބޭނުންވާ ގޮތަށް އެތަނުގައި ހަމަލާ ކުރިއަށް ނުގެންދެވޭނެތީ. އެ މީހުންގެ ރޭވުން ބަދަލުކޮށް މަޖީދީމަގު ނީލޯފަރު ހިނގުމުގައި ހަމަލާދޭން ރޭވީ."
ނަޝީދަށް ހަމަލާދިން މައްސަލައާ ގުޅިގެން އެންމެ ފުރަތަމަ ހައްޔަރު ކުރި ހަތަރު މީހުންގެ ތެރޭގައި ހިމެނޭ ވ. ތިނަދޫ ހިޔާ، އަދުހަމް ރަޝީދާއި މއ. ފޭރުގޭ މުޖާޒް އަހުމަދާއި ގއ. ކޮނޑޭ، ފޮޅޭމާ ތަހުމީން އަހުމަދުގެ އިތުރުން ލ. ގަން ދުންފިނިއުފާ އަހްމަދު ފާތިހުގެ މައްޗަށް ދައުވާ ކޮށްދިނުމަށް އެދި ޕީޖީ އޮފީހަށް ވަނީ ފޮނުވައިފައެވެ.
އޭގެ އިތުރުން އެ މައްސަލައިގައި ހައްޔަރުކޮށް ތަހުގީގުކުރަމުންދަނީ ނ. މަނަދޫ، ނޫރީގޭ އަލީ ހައިޝަމް، މ. އުދެހިގެ އިސްހާގު، ގއ. ވިލިނގިލި، ހުދުރުވާގޭ، ފަހުމީ އަލީ އަދި އއ. މާޅޮސް، އަސަރީގޭ މުހައްމަދު ނާޒިމް އާއި ހއ. މޮޅަދޫ، ބަހާރުގޭ އަބްދުﷲ އަލިމަނިކުގެ އިތުރުން ހއ. ހޯރަފުށީ، އަލަނާސިގެ މުހައްމަދު ތަސްލީމް އެވެ.
